Isbadal Doonkii UDUB Oo Ku Soo Biiray Xisbiga Kulmiye, Xaflad Balaadhan Lagu Soo Dhaweeyay
Hargeysa (Kulmiye.org)-Xisbiga KULMIYE Oo Xaflad BalaadhanHargeysa(Kulmiye.org)- Xisbiga KULMIYE ayaa maanta xaflad balaadhan oo ay ku soo dhawaynayeen garabka isbedel doonka xisbiga UDUB ku qabtay Huteelka KAAH ee Bariga Hargeysa. Siyaasiyiinta ku soo biiray xisbiga KULMIYE waxa Hoggaaminayay Wasiirkii hore ee Caafimaadka iyo shaqada Md. Cabdilaahi Xuseen Iimaan (Darawal) iyo Guddoomiyaha Garabka Isbedel doonka UDUB Md, Axmed Sandoon Xasan waxaaba xubno ka mid ahaa 8 Xildhibaan oo ka tirsan Golaha Wakiilada, 5 Xildhibaan oo ka tirsan Golaha deegaanka Caasimada Hargeysa iyo xubno tiro badan oo ka mid ah garabka isbedel doonka xisbiga UDUB. Wasiirkii hore ee Wasaarada caafimaadka Md. Cabdilaahi Xuseen Iimaan (Darawal) oo ka hadlay xafladaasi wuxuu u mahad celiyay Mulkiilihii Huteelka lagu qabtay Xafladaasi ee KAAH ee Magaalada Hargeysa waxaanu ku bogaadiyay sidii uu gaashaanka ugu dhuftay dhawaan amar uga yimid Taliyaha ciidanka Booliska oo sheegay ku wargeliyay inaan Huteelka lagu qaban xaflad taageereyaal KULMIYE ku soo biiray lagu soo dhawaynayay. Wasiirkii hore ee Caafimadku wuxuu sheegay in loo baahan yahay in KULMIYE u diyaargaroobo wax kasta oo kaga yimaada xisbiga UDUB, waxaanu yidhi "Ma arko in la yidhaahdo UDUB waa dambaska oo waxeenu meel bay inoo yaalaan, nimanka aan Anigu meesha kaga imid rag waxan aad ka sheekaynaysaan hayaba ma aha waa rag wax kastaa ka suurtoobi karaan. Nimankani waa quus, ragguna iskuma jiraane'e ragga badankiisu waxba kama war hayaane'e mushaharka uun bay iska qaataan.laakiin rag tirsan oo u haysta Somaliland inay u dhamaatay haddii uu Rayaale tago ayaa jooga oo wax waliba ka suurtoobaan. Markaa waxa la inooga baahan yahay inaynu dagaalka noocaasi ah u diyaar garowno, qoladiina KULMIYE-na Nabadgelyada uun baa la idinku bajinayaa markaasay bash idinka odhanaysaa." Md. Cabdilaahi Darawal, wuxuu xisbiga KULMIYE uga mahad celiyay sida diiran ee ay u soo dhaweeyeen. Guddoomiyaha Isbedel doonka xisbiga UDUB Md. Axmed Sandoon Xasan, oo xafladaasi ka hadlay ayaa Hoggaanka xisbiga KULMIYE uga mahad celiyay sidii loogu soo dhaweeyay xisbigaasi waxaanu yidhi "Waxaynu u baahan nahay dawlad dalka horumarkiisa ka shaqeysa Haddii aan Guddoomiye markii hore aan Madaxweynenimo doono dhab ayay iga ahaydoo waxaan islahaa Daahir Rayaale yaanu soo noqonine'e xisbiga UDUB gudahiisaba ku soo reeb, waa kii nalaga cararay ee Maasoor ciidankii la gsalay. Guddoomiye Waxaanu doonaynaa inaynu xoogeenna midayno. Horta waxaan ka fikirayay haddii aad Daahir Rayaale reebto oo halkaasi kaga tagto Odaygii Siilaanyo ayaa halkaasi soo fadhiyee sidee ayaad ula tartamaysaa. Ilaahay mahadii maanta fikirkaasi igima jiro oo ma tartamayno waan ku dhisayaa. UDUB-na waxaan rabaa inaanay sodon sanadood madaxtinimada ku soo tukan. Waxaan leeyahay UDUB ha eersato sacabka ay iska tumayaa." Md. Axmed Sanadoon wuxuu sheegay inay si hagar la'aan ah ula shaqayn doonaan xisbiga KULMIYE. Sidoo kale,waxa xafladaasi ka hadlay Md.Maxamed Xaaji Hadliye , Md. Axmed Maxamed (Axmed Dheere) waxaanu sheegay inay ku faraxsan yihiin in xisbiga KULMIYE ay ku biiraan waxaanu yidhi "Aad iyo aad ayaanu ugu faraxsan nahay inaanu ku biirno KULMIYE, waxaan qoladiinan KULMIYE u sheegaynaa qoladayadii NSS-ta aad ayaad walaac uga qabteen waxaan idin leeyahay imika waanu idinku soo biirnay ee sidaasi la socda." IWaxa kale oo iyaguna madashaasi ka hadlay Md. Maxamed Odawaa Cigaal kuwaasi oo dhammaantood ka waramay xaalada dalku marayo oo ay tilmaameen in loo baahan yahay isbedel weyn. Waxaanay sheegeen markii ay tashi badan sameeyeen ay goosteen inay ku biiraan KULMIYE. Guddoomiyaha Xisbiga mucaaridka ah ee KULMIYE Md. Axmed Maxamed Maxamuud (Siilaanyo) oo ka hadlay xafladaasi wuxuu yidhi "Waxaan u mahad celinayaa dadweynaha sharafta leh ee ka soo qeyb galay xafladan balaadhan ee aynu ku soo dhawaynayo Garabka Isbedel doonka xisbiga UDUB.waxaan leeyahay walaalayaal qalbi furan iyo walaaltinimo ayaan ku soo dhawaynaynaa waxaan idiin sheegayaa khamiista soo socota haddii Alle yidhaahdo waxa xisbiga KULMIYE soo bandhigi doonaa barnaamijka iyo Himilada uu doonayo inuu ku hago dawladnimada soo socota waxaan rajaynayaa in barnaamijkaasi uu noqdo mid ka turjuma baahida iyo isbedelka aan doonayno ee dhinacyada kala duwan. Waxaanu doonaynaa in dalkan halganka adag loo soo galay aanu hagno kuna hoggaaminayo dariiqa saxda ah ee cadaalad u keeni kara ee horumar u keeni kara." Guddoomiyuhu wuxuu sheegay inay ku rajo weyn yihiin inay ku guulaystaan doorashada madaxtooyada ee fooda inagu soo haysa waxaanu yidhi "Waxaan Maanta kalsooni badan ku qabaa waynu ku guulaysan doonaa doorashadan madaxtooyada haddii Alle yidhaahdo, saacadii uun baan lagu dhawaaqin laakiin waa la sheegay in wakhtigii doorashadu aad iyo aad inoogu soo dhow yahay, waxaynu doonaynaa inaynu xaqiijino cadaalada iyo isbedelka la doonayo. Dalkeenu nabadgelyo , Ictiraaf iyo horumar ayuu u baahan yahay." Gabo-gabadii xafladaasi waxa Guddoomiyaha KULMIYE Md. Axmed Maxamed Maxamuud (Siilaanyo) iyo Guddoomiyaha Isbedel doonka xisbiga UDUB Md. Axmed Sandoon Xasan ay kala saxeexdeen heshiiska ay la xidhiidha Mabaa'dida ay labada dhinac ku heshiiyeen kuwaasi oo nuxurkoodu ahaa inay kaalin ka qaatay olalaha doorashada isla markaana ay si rasmi ah xisbiga uga mid ahaadaan laga bilaabo maanta. |
Guddoomiye Ku Xigeenka koowaad ee xisbiga mucaaridka ah ee KULMIYE, Md. Muuse Biixi Cabdi, oo ka hadlay xafladaasi wuxuu yidhi " Waxaynu maanta marka hore u akhriyi doonaa Faataxo dhammaan dadkii u u soo shihiiday dalkan Xoriyadiisii ee u God-galay, gaar ahaan maanta waxa cajiib ah in la aasayo lafihii Xasan Saleebaan, oo ahaa sarkaalkii ugu horreeyay ee xabadi ku dhacdo Ururkii SNM, Alle ha u naxariisto Xasan Saleebaan dhawr iyo lixdankii ayay Cadan ka yimaadeen.nasiib wanaag isku galas ayaanu noqonay dugsigii Cammuud.mar labaad Ruushkii isku Ciidamadii Cirka ayaanu noqonay, mar sadexaad isku Jabhad ayaanu noqonay inshaalaahu Janadana waanu iskugu tagi doonaa haddii Alle yidhaahdo."
"Waxaanu u soo jeedinay qoladii qaban qaabada dawlada ee aaskii lafihii Marxuum- Xasan Saleebaan, waxaanu u sheegnay inay Arbacada ka dhigaan aaska, laakiin waxaad moodaa inay dadka qaarkii wax walba Kaambayn ka dayaan, saaka uun baanu aragnay Wasiirrada kalahaya. Way mahadsan yihiin haddii ay aasaan lafihii waayo waxay ahaayeen markii horeba kuwii daawanayay ee aan halgabka waxba ka tarin,"Ayuu yidhi Muuse Biix Cabdi.
Guddoomiye Ku Xigeenka KULMIYE wuxuu sheegay inuu aad u soo dhawaynayo, waxaanu yidhi "Haddii aynu nahad bulsho weyntii KULMIYE waxa inoo sharaf ah oo inoo guul ah haddii walaalaheenii wax garadka ahaa ee masuuliyiinta ahaa ee talada dalka ragga kuwa ugu waaweyn ka mid ahaa ay maanta fikradoodii iyo Tii KULMIYE midoobeen. Waxay farxad weyn ayay u tahay inta jecel horumarka dalka ee inoo fiicnaado inta jeceli maanta Guul weyn ayay ku tahay. Waxay maanta dhabar jab ku tahay inta aan dan ka lahayn horumarka qaranka. Haddii aynu maanta eegno ragga inagu soo biiray ee aynu wada hawl geli doono.waxa xaqiiqo ah in maanta markaynu xaalada dalka qiyaasno in dalku u baahan yahay isbedel siyaasadeed. Lixdii urur ee Tartamayay doorashadii Goleyaasha deegaanka Xisbiga UDUB mooyaane intoodii badnayd waxay ku biireen KULMIYE., maantana waxa ku soo biiray Hoggaankii Urur siyaasadeedkii Birsol iyo Aasaaseyaashii UDUB.Xisbiga UDUB waxa Maxamed IbraahimCigaal la soo aasaasay Axmed Yuusuf Ducaale, sidii uu uga tagay waad ogaydeen, Gees sidii looga siibay waad ogaydeen. Cabdilaahi Darawal, oo maanta socda oo raggii dhidibada u taagay."
Muuse Biixi, oo si gaar ah ula hadlayay siyaasiyiinta ku soo biirtay xisbiga KULMIYE wuxuu yidhi "Waxaanu Idiin haynaa walaatinimo, waxaanu aaminsan nahay tallada haddii la rog rogi waayo way qudhuntaa sida maanta Somaliland madaxtooyada haysata.. KULMIYE waxaad ugu imanaysaa dhammaanteen illaa Axmed Siilaanyihii Aaasaasay KULMIYE talladu waa inoo dhex,waxaad noogu imanaysaan inaynu xisbiga u siman nahay mid ku soo horeeyay iyo mid cusub midna ma kala lihin.waxa KULMIYE loogu soo hagaagayaa in tallada loo siman yahay barri iyo galbeed waxa kale oo KULMIYE astaan u ah inuu qof kasta sharcigu xukumo, oo sharcigu noqdo mid kooxi danteeda ku fushato."
"Ragga ku soo biiray xisbiga KULMIYE waxaan dhammaantood u soo dhawaynayaa si hagar la'aan ah hebel iyo hebel odhan maayo waxa kaliya oo aan si gaar ah u soo dhawaynayaa Maxamed Xaaji Hadliye oo qudha waxaanan leeyahay kaalin aad u weyn oo banaanayd ayaad soo buuxisay ee soo dhawoow,"ayuu yidhi Guddoomiye Ku Xigeenka koowaad ee xisbiga KULMIYE.
Guddoomiyaha Olalaha doorashada Madaxtooyada ee xisbiga KULMIYE ee gobolada barriga Somaliland Dr. Maxamed Cabdi Gaboose, oo xafladaasi ka hadlay ayaa sheegay inuu aad iyo aad u soo dhawaynayo siyaasiyiinta ku soo biiray waxaanu yidhi "Waxa ugu weyn ee aad KULMIYE ka helaysaan waxa weeye waxaad ka soo guurteen goob mugdi ah oo dood iyo ra'yi isdhaafsi aanu jirin. Haddii aad markaad na aragtaan dooda aad u malaysaan inaanu nahay xisbi fowdo ah, walaalayaal fowdo ma nihin ee muddo ayaad mugdiga ku jirteene'e naga raali ahaada. Xisbiga KULMIYE waxa idin keenay ayaa Urur-siyaasadeedkii Qaran-na keenay. Xaqiiqdii dalku wuxuu u baahan yahay isbedel.inteena halkan fadhidaa waa inteena runta og waliba qoladiina UDUB ka timid waxaad ka timaadeen ceelkiiye'e waa inaad noo sheegteen waxa jiray."
Dr. Gaboose wuxuu sheegay in doorashadii ay dhacayso haddii alle yidhaahdo waxaanu tilmaamay inay ku faraxsan yihiin waxaanu ku adkaystay inuu u arko ku guulaysan doonaan doorashada Madaxtooyada.
"Xisbiga KULMIYE wuxuu soo bandhigayaa Barnaamij siyaasadeed oo hufan hase yeeshee ay UDUB dhexaad u tahay siyaasad furfuran, dib dambe uma arkaysaan wax xidh xidhan,shiidaalkii baa la xidhay, Adhigii ayaa la xidhay, Kalluunkii ayaa la xidhay, siyaasadii ayaa la xidhay iyo Saxaafadii ayaa la xidh xidhay. Xisbiga KULMIYE waxay u taagan yihiin siyaasad furfuran,"Ayuu yidhi Dr.Maxamed Cabdi Gaboose,waxaanu tilmaamay in dadweynaha Somaliland ku qanci doonaan Barnaamijka xisbiga.
Dr.Maxamed Cabdi Gaboose wuxuu sheegay inuu ilaahay uga baryayaa Madaxweyne Ku Xigeenka Somaliland uu ka dul qaado xanuunka, si ay u tartamaan iyagoo walaalo ah..
"Waxaan idiin sheegayaa raggayagan maanta meesha maraya ee ku soo biiray xisbiga KULMIYE, waxay nala noqotay in haddii aanu nahay raggii isbel doonka ahaa ee UDUB in halkii ninba xisbi ku biiri lahaa aanu meel u wada mari lahayn, waxay nala noqotay inaanu garab galo xisbiga KULMIYE. Horta raggayagan idinku soo biiray marka la eego Xildhibaanada Baarlamaanka 8 Mudane ayaa ku jira Isbedel doonka UDUB, halka ay ku jiraan Golaha deegaankana shan Xildhibaan,"ayuu yidhi Md. Cabdilaahi Darawal, waxaanu xusay in laba nin oo xisbiga KULMIYE ka soo baxay ay Noqdeen xisbigii UDUB waxaanu yidhi "Gole dhexe iyo Xisbina ma jiro xisbiga UDUB laba nin oo aanu saaxiib nahay oo Xisbigiina KULMIYE ka soo cararay ayaa meesha maraya cid kale ma aragno.maalintii uu Cali Guray saaxiibkay weeyaane UDUB galay Ingiriiska ayaan joogay meesha uu tagay ayaan ka naxay siday tahay iyo isaga jacayl aan ka qabay, waa kii maalintii dhawayd ila taliyayoo waan la hadlayoo waxaan ku idhi adiguna meel baad ka soo carartay Aniguna meel ayaan ka cararay ee bal keena soo hungooba ha la arko."
No comments:
Post a Comment