War-Saxafadeed: Ka Suxufi Ahaan iyo Ka Aqoonyahan Ahaan Waxaan Taageeradaydii Siiyey Xisbiga KULMIYE Iyo Musharaxiintooda Axmed Siilaanyo Iyo Saylici
|
Wariyaha Madaxa Wararka Golisnews.com Anigoo magacaygu yahay Maxamed Cabdi Xasan (Diridhaba), waxaan inbadan dad badani aad i weydiiyaan mawqif ahaan, siyaasad ahaan, iyo fekrad ahaan waxaan ka qabo dalkii aan u dhashay, dadkii aan ka dhashay iyo deegaankii aan ka soo jeeday, dabcan anigoo ah Suxufi reer Somaliland ah iskuna tiriya dadka u ehelka dhaw inaan arko dalkii aan u dhashay oo rajo ahaan iyo mustaqbal ahaanba kasbada waxay naawilayeen ku dhawaad 50 sannadood xornimadii ay helleen oo aan weli u muuqan in ay naacawdeedii heleen. Dad badan ayaa waxay moodaan in Somaliland ay soo bilaabantay 18 May 1991-kii,30 sannadood ka hor xornimadii aynu ka qaadanay gumaystahii Great Britain waxaan huba in dhallaan iyo dhalinyaro badani oo maalintii callanka laga taagay Beerta Xorriyadda ee caasimadda Hargeysa oo boqol tallaabo wax ka yar u jirta gurigii aan Hargeysa ee aan ku dhashay ay naawilayeen in ay maruun arkaan qiiraddii iyo dheeftii badnayd ee ay u hureen xornimada midhaheeda. Markaan ka imaado Hunguri beelka siyaasadda iyo xafiiltanka dilay rajadii shacabkayga aan jecelahay, markaan ka imaado kuwii loo haneeyey inay dalka ka saaraan dhibaatadii rafaadka badnayd ee halgankii 50 jirka ahaa ee loo hanweyna inay dalka u horseedaan wuxuu higsanaayey ayeynu maanta akhristayaal markhaati u nahay halkay dalkeenii iyo dadkeenii geeyeen. Waxaa Hubaal ah in dad badan oo reer Somaliland ahi isweydiin karaan maxaa ku kelifay Maxamed inuu hormood ka noqdo mawqif aan saxaafadda looga baran oo ah taageero badh furan oo aan siinaayo qayb siyaasadeed aan qabo inay dalka rajo beelka ka saaraan, dabcan Saxaafaddu waa halbawlaha hagta isku xidhka shacabka iyo siyaasadda maadama oo ay sidaasi tahay waxaa hubaal ah in saxaafadda ama suxufigu uu uga xogogaal badanyahay ciduu bidayo inuu dalka ka saaro dhibaatooyinka shacabka caadiga ah. 3 sannadood oo aan Hargeysa Joogay ayaan guntiga dhiisha iskaga dhigay bal inaan guud ahaan dalkii aan u dhashay xaaladiisa eego, waxaan soo taabtay inaan salkii dawladnimadu aanu kaba jirin gobolada iyo degmooyinka Somaliland 20 sannadood ee Somaliland xornimadeeda ku faanaysay waxay dawladnimadu dhaafi wayday caasimadda Hargeysa, waxaanan daraasad balaadhan oo aan bilaabay 15 July 2006 ku soo gunaanaday in qaranimadii Somaliland laga tuuray bohol madaw, oo xita iska dhaaf horumar loo horseeda eh ay adkaanayso cidda dhaxasha bedelka Daahir Rayaale sidii ay godkaasi uga saari lahayd, waxyaabaha akhristow daraasaddaan sameeyey iiga soo baxay ayaan ku soo uruuriyey 1. Markaad Caasimadda 5 Km dhinaca berri u dhaafto ayaa kuugu danbaynaysa hannaaan socodkii maamul ee dawladnimada iyo qaranimada Somaliland 2. Shacabka Somaliland guud ahaanba maba fahamsana waxay xaqa u lahaayeen oo ay ahayd masuuliyadda koobaad ee xukuumadda in ay shacabka u bandhigto waxay xuquuq u leeyahiin iyo wax xaq iyaga loogu leeyahay dadkuna weli waxay kala saari laayahiin dawladnimadani lagu dhawaaqay 20 sanno ka hor waxay kaga duwantahay tii ay xoolo iyo xoog waxay lahaayeen u hureen ee ay Somaliland ugu wan qaleen 3. Gebi ahaanba ma jiro kaabo dhaqaale oo dalku leeyahay cidda tidhaahda dalku dhaqaale ayuu leeyahay been ayuu sheegay, ilo dhaqaaleedka dalku wa shariikado u shaqeeya shakhsiyaad gaar ah, tusaale waxaa kuugu filan Dekedda Berbera oo lagu qeexo halbawlaha dhaqaalaha Somaliland waxaa kharashka ka soo galla lagu soo qaada shandado iyadoo laga soo daabulo khasnadaha cashuurta isla markaana toos waxaa loogu geeya Madaxweynaha dalka oo isaguna si bilaa xisaab ah ula wareega waxana lacagtaasi oo ah mid nool oo kaash ah la dhiga qolka jiifka ee Madaxweynaha. 4. Xukuumaddii dadku doortay ee Daahir Rayaale Madaxweynaha looga dhigay waxay noqotay sida koox maafiya ah, tusaale cad waxaan idinka siinaya xubnaha la sheego inay wasiiradda u yahiin ma kala war qabaan, isaga laftigiisa oo ah Madaxweynahii dalku maba yaqaano xubnaha wasiiradda u ah tusaale ayaan idinka sinaya sannadkii 2006-dii Bishii July ayuu Madaxweynahu warbaahinta ka sheegay inuu isku shaandhayn ku sameeyey golahiisa wasiiradda wuxuu shan jeer oo is xiga magacaabay Wasiiru dawle, iyadoo markasta lagu sheegay inuu khalad madbici ahi dhacay balse waxaa la ii sheegay in Madaxweynaha loo yeedhiyo ciduu magacaabayo bilaa tashi xita isago aan laba kulmin shakhsigaasi ummadda dhan masuul looga dhigayo. 5. Wasiiradda Ina Rayaale qayb dhan ayaan ogayn siyasadda dalka lagu maamulo una magacaaban magac u yaal iyo buuxinta jago beeleedka reereed, ta kaaga darran Madaxweynahii dadku doortay ee awoodda dadka lagu doortay iskumaba haysto inuu yahay ninka dalka maamula waxaa dhegta loogu sheega in beeli dooratay. 6. Somaliland qaab dawladnimo kama jiro, waxaa lagu tuuray dalkii aan jecla bohol dheer oo u baahan in wakhti loo huro sidii looga saari lahaa, waxaa xukuumaddi dadku doortay curyaamisay golayaashii dalka, waxay baabisay garsoorkii iyo maxkamadahii oo ay ka dhigtay qaar danta maafiyaysan ee kooxda Rayaale magaciisa ku fadhida tallada dalku siday doonaan ka yeelaan. 7. Qaabkii golaha wasiiraddu wuxuu noqday faashil burburay waxaad maanta aragtaan wasiir loo magacaabay waxbarashada ama Caafimaadka oo intuu masuuliyadiisii garan waayey ka hadlaya waxaan loo dirsan: bal ilaahayban idinku dhaarye halkeed ku aragteen wasiir loo xil saaray masuuliyad dhan oo qarranku leeyahay oo ah weliba kuwii ugu muhiimsana oo ka hadlaya beelo isla markaana caytamaya, waa faashilka aynu maaanta ku hayno xukuumadii aynu dooranay Haddaba Maxaa Xal Ah: Soomaalidu waxay tidhaahda Baso waa Baso si kastoo loo subko, dad badan ayaa jira oo aan hubo oo Maanta xukuumadda iyuo xisbigeeda UDUB taageera oo keliya ku taageera shakhsiyaad ay isku ehel iyo agab yahiin, waar maanta dalkeenii meel xun ayuu maraya, waxaynu u baahanahay dad aynu aamino oo bal dalkii bohol ayuu ku dhacaye ka soo saara dabadeed markay ka saaran aynu xisaabta kale iskula nimaadno eh. Anigu waxaan ahay Suxufi Waxaan ahay nin jecel dalkiisa iyo dadkiisa, waxaan ku qaatay wakhti badan oo aan qof kale ku qaadan, dad badan ayaa go´aankooda ku saleeya maxaa dhaqaale, magac iyo maamuus ka soo gallaya haddii aad xisbi hebel taageerto, wallaahi ayaanan magac iyo meeqaam iyo maal midna ka rabin aan ka ahayn in dalkaasi gaadho himiladiisa dadka u noolina noqdaan dadka ugu nolol fiican dunida. Muddo dheer ka dib markii aan fekeray ee aan fekeray ee aan muddo odoroso, naftayda iyo inta dalka jecelba la tashaday, waxaan go´aan ku gaadhay inaan taageero dhaq dhaqaaqa Xisbiga mucaaridka ah ee KULMIYE, dad badan ayaa isweydiin kara Maxaa Diridhaba uu ku doortay Kulmiye Kulmiye aniga iigama duwana UCID labada xisbi waa laba xisbi oo mucaarid ah waxaanan huba mid kasta oo qabta tallada dalka Somaliland inuu horseedi karo horumar ka baaxad badan bohosha aynu maanta ku jiro, balse qof kastaaba dookh ayuu leeyahay waxaan eegay dadka ku jira waxaan odorosay dadka ku jira intay daacad ka tahay inay dalka ka saaran bohosha uu ku dhacay, waxaan inbadan la sheekaystay oo aan qoday in ay fulinayaan barnaamijkaasi isbedel doonka ah. Waxaan noqonaya suxufigii ugu horeeyey ee si badheedh ah oo cad oo aan mugdi ku jirin ugu yaboohay taageeradiisa Musharaxiinta Xisbiga Kulmiye Axmed Maxamed Maxamuud Siilaanyo iyo C/raxmaan Saylici, waxaanan ka codsan lahaa wergeysyada iyo warbaahinta kale inay igu soo biiraan oo ay taageeraan xisbiga KULMIYE, ceeb maaha dastuurka Somaliland na xaq ayuu inoo siiyey inaynu taageerno ciddii aynu u arki karno inay dalka bohosha ka saari karaan Markale ayaan ku celinaya Waxaan taageersanahay siyaasadda iyo barnaamijka Xisbiga Kulmiye waxaanan qayb ka qaadanaya abaabulka iyo wacyi gelinta shacabka Somaliland waxaanan ugu baaqaya dhammaan dadka akhista qoraaladayda lana socda barnaamijyadayda inay taageeraan una codeeyaan Xisbiga KULMIYE. Taasi macnaheedu maaha waxaan ku biiray Kulmiye anigu kuma biirin kulmiye kamana doonayo xil iyo magac waxaanan ula simanahay muwaadiniinta kale laakiin waxaan qayb ka noqonaya ololahooda doorashada oo aan geed dheer iyo ku gaabanba u korayo inay xilka qarranka ugu sareeya hantaan. Mohamed Abdi Hassan (diridhaba) Dubai, UAE |
No comments:
Post a Comment